ඉතාලියේ ෆිරෙන්සි නගරයේ තට්ටු නිවාස සංකීර්ණයක නිවසක් තුළදී සාදයක් පැවැත්වීමේ චෝදනාව යටතේ වැරදිකරුවන් වූ ශ්‍රී ලාංකිකයින් 11 දෙනෙකුට එරෙහිව ඉතාලි පොලීසිය විසින් දඩ මුදල් නියම කර ඇති බව ඉතාලියේ තානාපති කාර්යාල ආරංචි මාර්ග සදහන් කරනවා. කොරෝනා වසංගතය හමුවේ ඉතාලිය සම්පූර්ණයෙන්ම වසා දමා (ලොක්ඩවුන්) තිබියදී මෙම සාදය පවත්වා තිබෙනවා.
කලක් තිස්සේ එරට වාසය කළ ලාංකිකයින් පිරිසකට මෙලෙස දඩ මුදල් නියම කර ඇති අතර මෙම ලාංකිකයින් 11 දෙනා ඉකුත් 19 වැනිදා රාත්‍රියේදී ෆිරෙන්සි නගරයේ ජනාකීර්ණ තට්ටු නිවාස සංකීර්ණය පිහිටි නිවසක් තුළදී මෙම සාදය පවත්වා තිබෙනවා. පසුව ඒ සම්බන්ධයෙන් අසල්වැසි නිවෙසියන් ඉතාලි පොලීසියට කළ පැමිණිල්ලකට අනුව එම ප්‍රදේශයේ හදිසි වැටලීමක් සිදුකර තිබෙනවා.
ඒ අනුව එම වැටීම සිදුකළ අවස්ථාවේදී ලාංකිකයින් 11 දෙනා සාදය පවත්වමින් සිට ඇති අතර නිවස තුලට කඩා වැදුනු ඉතාලි පොලීසිය විසින් ඔවුන් එකිනෙකාට අදාල වැරදි අනුව යූරෝ 400 සිට යූරෝ 3000 දක්වා වූ දඩ මුදල් පනවා ඇති බවයි තානාපති ආරංචි මාර්ග සඳහන් කළේ.
මෙම පිරිසට වෙනත් නිවසක අය තම නිවසට ගෙන්වා ගැනීම, තම නිවසෙන් පිට වෙනත් නිවසකට යාම නිසා ස්වයං නිවාස අඩස්සි නීතිය කඩ කිරීම, එකම ස්තානයක සිටිය යුතු ප්‍රමාණයට වඩා රැස්වීම, රාත්‍රී අන් අයට කරදරකාරී ලෙස ශබ්ද කිරීම සහ සාද පැවැත්වීම යන එරට නීති උල්ලංඝනය කිරීම යටතේ මෙම දඩ මුදල් පනවා ඇතැයිද එම තානාපති ආරංචි මාර්ග සදහන් කරනවා.
කෙසේ වෙතත් සියලුම දඩ වල මුළු එකතුව එරට පොලීසිය සඳහන් කර නොමැති සමස්තයක් වශයෙන් එය "සුපිරි දඩයක්" බවයි තානාපති ආරංචි මාර්ග සදහන් කරන්නේ.
No comments:
Post a Comment